صديقى صاحب المحل التجاري -1

لدى صديق يدير عمل تجاري لمصلحته , محل لبيع لوازم كهرباء (لمبات, اسلاك , كيابل , طبلونات ...). صدف ان جلست اليه , وعادة ما أفعل, وكان موعد الجرد السنوي بالمحل, لاحظت تكدس البضائع والقطع باحجام ومقاسات وانواع مختلفه  بالمحل لدرجة مزعجة وكذالك لاحظت الفترة الزمنية والمجهود البدنى لطاقم عمله (محاسب, مندوبين, سائق دينا, عامل عادى) فى انجاز العمل, لمدة ثلاث أيام والجرد جارى وها أنذا اراقب الفوضي وسمعت المحاسب يقرر انه تبقى بعض الوقت لانجاز الجرد .. يعنى تانى يوم ولا يوميين !!!  وستظل لافتة " المحل مغلق للجرد" ..

حاولت ان استعلم صديقى عن مستوي المخزون لديه وخضنا الحوار التالي:

- لما كل هذه البضاعه ؟؟
- هو السوق عاوز كده ..
- كيف؟ السوق بتطلب تخزن بضاعه بهذا الحجم؟ لماذا؟
- أحياناً بتجيك اوردرات (طلبات العملاء) ولازم تتوفر عندك البضاعه .. ما تنسي ان تركيزنا على التوريد للجهات الحكومية.
- وهل الجهات دى بتطلب منك ترسل البضاعة فور استلامك للاوردر؟
- لا .. طبعاً بتكون فى فترة متفق عليها.
- أذاً ليس شرطاً أن تتوفر البضاعة بكل هذا العدد عندك .. خصوصاً ضيق المكان وما عندك مستودع خارجي ..
- ما بنخسر شئ .. ما البضاعه دى كلها بتجينا عليها عروض تخفيض..
- كم بتقعد عندك لحدى ما توردها لزبائنك؟ وكم تكلفة الجرد الذى تم هذا اليوم والايام الفائتة وكمان يمكن بكره وبعدو ..
- ما بكلفنا شئ .. نحنا بنقوم بنفسنا بالجرد  و ...
- (قاطعته) وانت وموظفينك رواتبكم مش ماشه ايام الجرد؟ المحل مش مقفل كل ايام الجرد؟  الوجبات والمشروبات على حساب المحل أكيد مش متاحه ايام العمل العاديه (ضحكت هنا)
- ما الرواتب ماشه ماشه وتانى التوريدات واقفه أصلاً .. والبيع المباشر للجمهور أصلاً ما تركيزنا .. يعنى 15 الى 20 بالميه كده.
- مارقم سهل برضو .. المهم انت الان بتصرف ما بتدخل .. وكان ممكن يكون أقل من كده لو المخزون قليل ..
- قاطعنى قائلاً: ما البضاعه دى أصلاً ما بتتلف .. ما مواد غذائية هى .. وبنربح فيها أكتر لانو ذى ما قلت ليك مشترينها فى عروض بسعر أقل ..


نواصل لاحقاً حواري مع صديقي صاحب المحل التجاري ..